كلنا طبعا مضايقين من وضع مصر الحالى

كلنا طبعا مضايقين من وضع مصر الحالى

ولو فتحت سيرة اللى بيحصل فى البلد مع اى حد مش هتطلعوا حاجة واحدة حلوة

هيكل اى بلد عبارة عن جوانب ( اقتصادية - اجتماعية - سياسية - شرعية - عسكرية - تعليمية - صحية - ثقافية(

المهم ان دى منظومة متكاملة - ولا بلاش كلمة منظومة دى اصل تحسوا انى والعياذ بالله مسؤل ولا حاجة

يعنى تقدروا تقولوا سلسلة كده وماسكة بعضها - لو حلقة فلتت كله بيضيع - .

-----------------------

1- اقتصاديا :-

هيكلها الاقتصادى ضعيف ومعرض لهزات الاقتصاد العالمى بمنتهى السهولة

وده بدليل الارتفاع الكبير فى الاسعار اللى حصل فى مصر فى ال 3 سنين الاخيرة

وده كان نتيجة للارتفاع العالمى لاسعار السلع الغذائية

واللى اتأثر بيه دول العالم التالت بس

يعنى الدول المتقدمة - والدول اللى عايمة على بحيرات البترول متأثرتش بالتغير فى الاسعار طبعا

معدل النمو زاد فى اخر سنتين والاستثمار بدل ما كان مليار جنيه سنويا بقى 7 مليار وشوية فكة كده

جميل شئ عظيم جدا من حكومة نظيف

بس كان فى تأثير مباشر على مستوى معيشة الفرد المصرى ؟

الاجابة : لاء طبعا

مستوى المعيشة بيقل وبيزيد سوء

تقريبا كان البنك الدولى قال من سنتين ان اللى مرتبه فى مصر اقل من 700 جنيه مقارنة بالاسعار السارية يبقى بيعيش تحت خط الفقر

طيب وبعد الارتفاع الكبير فى مستوى الاسعار دلوقتى يبقى ايه الوضع ؟

م الاخر ياجماعة فى بلد زى بلدنا مبتنتجش اى حاجة فى اى حاجة البيزنس كله بيبقى سمسرة وعمولات

يعنى مضاربه وده مش بيحرك الاقتصاد بالعكس ده بيدفنه

واللى ميعملش كده يخبط راسه فى الحيط

او ياكل من الصخر

ناهيك عن الاحتكار وسيطرة راس المال ل 5 او 6 رجال اعمال يقدروا يوقفوا اقتصاد البلد ويقعدوه تانى على حسب مودهم

-----------------------

2 - اجتماعيا :-

طبعا واضح الفرق الكبير بين الطبقات

الطبقة المتوسطة اختفت من كام سنة كده

يعنى ياما فوووووووووق ياما تحـــــــــــت

وانت ونصيبك بقى

وده نتاج طبيعى للهبوط الاقتصادى انو يتبعوا هبوط اجتماعى

وهبوط اخلاقى - ان كل واحد بيجرى على لقمة عيشه وخف عن دماغى بقى يا استاذ -

غير انتهاكات الشرطة واللى بيتكلم بيطلع عين امه
-----------------------

3 - سياسيا :-

مصر محدش ينكر انها ليها مكانة سياسية كبيرة

بس للاسف متحجمة بسبب المعونة الامريكية - وكلنا عارفين ان محدش بيقدر يقول لامريكا تلت التلاتة كام بدل هيا اللى بتصرف علينا ولو قالت بــم هتطيرنا -

وسيبك بقى من الكلام الحلو اللى بيطلعوا يقولوه ان مصر دولة صديقة لامريكا وان العلاقات طيبة

م الاخر العلاقة بينا وبينهم علاقة العبد بالسيد مش اكتر ولا اقل

روحوا يمين نروح يمين - روحوا شمال نروح شمال

هنتكلم ازاى واحنا مش عارفين نأكل نفسنا

من لا يملك قوت يومه لا يملك حريته " محمد حسنى مبارك - فى بداية مشروع توشكى العظيــم - "

*لو جينا نتكلم عن الثقافة السياسية هل متاحة فى بلدنا فى الجامعات او المدارس ؟

امل الدولة شغال على ودنوا وربنا يستر عليا

" والحزب الوطنى فتوة الحارة

وفبركة الانتخابات - والكوسة

على رأى استاذ فاضل كده كان قال كلمة

المسؤلين فى بلدنا بيتعينوا لولاءهم مش لكفائتهم
-----------------------

4 - اهاااااا الشرعية بقى :-

مصر فيها انتهاك واضح للشرعية

لدرجة ان جورج بوش طلع فى مرة قال ان امريكا كانت غلطانة لما تعاملت مع بعض الديكتاتوريين العرب زى حسنى مبارك

بس بعدها رجع فى كلامه تانى وبقوا حبايب سياسات بقى

لما واحد اجنبى يسألنى عن تداول السلطة فى بلدنا

اقوله ايه ؟

27 سنة محصلش تداول للسلطة - بس انا بقول اهو مش هجدد والحدق يفهم -

* اما بالنسبة للى حصل لبعض القيادات فى الاخوان المسلمين

اولا انا مش اخوان علشان تبقوا عارفين

بس دول ناس اتصدر ليهم احكام بالافراج من القضاء

والشرعية بتقول ان السلطة التنفيذية اللى هى الشرطة ملزمة بتنفيذ قرارات السلطة القضائية

وده بناء على القوانيين اللى بيتم طرحها ومناقشتها وفرضها من خلال السلطة التشريعية اللى هما المفروض نواب الشعب واللى بيتكلموا باسمهم

واللى انتخابهم بيكون بمنتهى النزاهة - علشان متبقاش القوانين على مزاج حد معين

المهم ان الاحكام مش بتتنفذ وده انتهاك للشرعية

بس بعد كده علشان ميكونش فى انتهاك للشرعية تم تحويلهم للمحاكم العسكرية

واللى مش عاجبه يخبط راسه فى الحيط

وبعدين احنا عايزين شرعية ازاى واحنا بقالنا 56 سنة تحت الحكم العسكرى ولحد دلوقتى كده

-----------------------
5 - عسكريا :-

الجندى المصرى مفيش زيه ابدا

بدليل اللى قاله عنه الرسول صلى الله عليه وسلم " اذا نزلتم مصر فاتخذوا منها جندا كثيفا فانهم خير اجناد الارض "

صدق رسول الله صلى الله عليه وسلم

ان هو الا وحى يوحى

يعنى الكلام ده حقيقى 100 فى المية

بس هل ننكر ان احنا جيش مش متقدم ؟

بتشوفوا العسكرى الامريكى ولا الاسرائيلى لابس ايه

والمصرى لابس ايه؟

ولا الطيارات والدبابات ؟

والفرق الشاسع فى الامكانيات - طبعا الجيش مش عساكر بس ده الامكانيات تقدر تعمل فارق كبير جدا -

----------------------------

6 - تعليميا :-

اللى ميشوفش م الغربال يبقى اعمى

من حوالى سنتين مصر كانت طالبة 5 قطع بحرية من امريكا كالعادة يعنى

المهم ان فى واحد فى الكونجرس يهودى تقريبا قام طلع كده وقال :

مصر محتاجة ال 5 قطع البحرية دول ليه فى ظل الحالة التعليمية والصحية السيئة اللى هيا فيها

واللى مايشترى يتفرج
-----------------------

7 - صحيا :-

ههههههه شر البلية ما يضحك

الخدمات الصحية فى مصر طبعا على اعلى مستوى

من يومين كده شوفت واحدة ابنها اتضرب بمطوة من بلطجى

راحت مستشفى شبرا عارفين عملوا ايه؟

حشوا ضهره شاش

وقالولها اطلعى على اى مستشفى كويسة مفيش هنا امكانيات

راحت مستشفى القصر العينى الفرنساوى حاجة زى كده

قالولها عايزين مبلغ تأمين على اساس انها مستشفى خاصة

على ما راحت معهد ناصر تقريبا كان ابنها مات - الله يرحمه -

ياترا مين المسؤل ؟

-----------------------

8 - تقافيا :-

نــــــحــــــــن بــــــلــــد الــــــفــــــن والـمـــهـــرجـــنـــات

الثقافة فى بلدنا بتنحصر فى المهرجنات والحفلات

منتظرين ايه من بلد وزير ثقافتها بيقول على الحجاب تخلف ومظهر غير حضارى

والمفروض ان البلد دى بلد مسلم

يعنى المسؤلين دول من بلد تانية ولا ايه محدش عارف

---------------------------------------------------

ده مجرد رأيى المتواضع ياجماعة

والباب مفتوح للمناقشة

مصر بلدنا ولازم كلنا نفكر ازاى نعلى بيها لان احنا المستقبل

-----------------------

بس قبل ما تتكلم فى اى حاجة لازم تتفاءل

انت فى بلد ملكها مبارك - واميرها جمال - ورئيس حكومتها نظيف - ورئيس مجلس نوابها سرور - ورئيس مجلس شورتها شريف